Aye Zindagi!

Aye Zindagi

Aye Zindagi! chal ek samjhauta kar lein aaj

Kyu naa doraahe se raasta hum bana lein aaj

 

Kuch tu aasaan ho jaa naa

Kuch main mazboot banta hoon

Kuch tu mere mutabiq ho jaa naa

Kuch main tere liye badalta hoon

 

Fir naa tu mujhse gila karna

Fir naa main shikwa tujhse karun

Fir naa tu kabhi mujhse roothna

Fir naa main tujhse naaraaz rahun

 

Ek kadam tu meri taraf to badha naa

Ek kadam main teri or chalta hoon

Thoda sa tu badal naa

Thoda main tujhsa dhalta hoon

 

Kisi mod par mujhse tu milna

Kahin teri raah par main aata hoon

Kuch baatein fir mujhse tu kehna

Kuch kisse main bhi sunata hoon

 

Is tarah kyu naa mujhsa tu hona

Jis tarah main tujhsa hota hoon

Aye Zindagi! Fir tu bhi meri ho jaana

Aye Zindagi! Fir main bhi tera hota hoon

 

Aye Zindagi! Ek samjhauta yoon kar liya humne

Fir doraahe se yoon raasta bana hi liya humne

 

 

 

Advertisements

3 thoughts on “Aye Zindagi!

  1. Kamaal karte ho Tiwariji.
    Akele hi dono taraf ki kahani bayaan kar diye,
    Hum zindagi se Dosti karne ki koshish karte rahe aur aapne baaton baaton shikayatein kar diye.
    Well written, loved it. Keep it up. 👍

Leave a Reply